Кошаркарската федерација на Македонија во соработка со ФИБА и ова лето продолжува со развојот на младите таленти, организирајќи ново издание на развојниот кошаркарски камп. Кампот ќе се одржи од 22 до 27 јуни во Негорски Бањи и ќе ги собере најперспективните кошаркари и кошаркарки од генерациите 2013 и 2014 година.
Вкупно 60 млади играчи, во машка и женска конкуренција, ќе бидат дел од овој проект, каде ќе тренираат и ќе ја унапредуваат својата игра под водство на стручни тренерски тимови. Во машка конкуренција селекцијата ја предводи Мартин Атанасовски со асистентите Мартин Анчевски и Никола Димитриевски, додека кај девојките главен тренер е Никола Петровски, заедно со Сара Стојановска и Јована Стојанова.
По направената селекција, веќе се избрани по 15 играчи во машка и женска конкуренција, а по завршувањето на финалниот турнир во М12 лигата ќе следуваат дополнителни селективни тренинзи за деца родени 2014 година, со цел комплетирање на групата со уште 30 учесници.
Овој камп претставува важен чекор во развојот на младинската кошарка во Македонија, со фокус на правилен тренинг, напредок и создавање на идни репрезентативци.
