По големата победа над Еурофарм Пелистер во Битола, ракометарите на Охрид ги очекува нов предизвик во плеј-офот – дуел против Тиквеш. Охриѓани влегуваат во натпреварот во одлична форма и позитивна атмосфера, со победничка серија зад себе, како во домашното првенство, така и на европска сцена по двете победи над Олимпијакос и пласманот во полуфиналето на ЕХФ Купот.
Тимот покажува континуитет во игрите, самодоверба и стабилност, што е јасен сигнал дека амбициите остануваат високи и во продолжението од сезоната. Очекувањата се за уште едно силно издание и продолжување на победничкиот ритам.
За претстојниот натпревар, своето видување го сподели крилото на Охрид- Никола Ристески, кој потенцира дека клучна ќе биде сериозниот пристап и задржувањето на победничкиот менталитет.
„По победата над Еурофарм Пелистер нè очекува уште еден натпревар- против екипата на Тиквеш. Ќе го дадеме нашиот максимум да ја продолжиме низата на победи.“- изјави Ристески.
Охрид има јасна цел – да ја продолжи успешната серија и да ја потврди одличната форма, додека Тиквеш ќе се обиде да ја прекине нивната победничка низа, што ветува уште еден возбудлив натпревар.
