Македонската ракометна сцена добива нов член, откако официјално е регистриран РК Феникс од Радовиш.
Според информациите на Спортска Мрежа, клубот веќе го доби решението за регистрација со што започнува една нова спортска приказна во овој град.
Зад проектот стојат добро познати ракометни имиња. Меѓу основачите се Игор Соколов и Љупчо Ѓорѓиев одлични познавачи на ракометот, со големо искуство, како и тренерите Спасе Ѓорѓиев и Александар Долдуров, кои во изминатите сезони оставија силен белег со Радовиш – обезбедувајќи пласман во Суперлигата преку бараж и потоа изборувајќи опстанок во елитата, а долги години го носеа дресот на Радовиш. Дел од основачката структура е и капитенот на Радовиш, Здравко Постолов.
Целосното име на клубот е ЗСРК Феникс Хандбол, а според најавите, станува збор за сериозен и добро осмислен проект со долгорочна визија. Плановите на клубот вклучуваат стабилен развој, јасна организација и поставување на здрави темели, со цел постепено градење конкурентен тим.
Со формирањето на РК Феникс, Радовиш добива уште еден ракометен колектив, што дополнително ќе ја зајакне спортската понуда во градот. Воедно, македонскиот ракомет станува побогат за клуб кој најавува амбициозен пристап и сериозна работа во периодот што следува.
Повеќе детали околу функционирањето, амбициите и идните чекори на РК Феникс се очекуваат наскоро, ексклузивно на Спортска Мрежа.
