Во пресрет на дербито со Вардар, капитенот на Пелистер, Мирко Ивановски, ја истакна важноста на натпреварот и моментот во кој се наоѓа тимот.
„Најголемото македонско дерби е вистински спектакл за целата земја – натпревар кој сите го очекуваат со нетрпение, како поради случувањата на теренот, така и поради атмосферата на трибините.
Победата во Тетово не ни донесе само три бода, туку и значаен пресврт во сезоната, особено во борбата за опстанок. Како што рече и претходно, триумф против екипа од првите четири може да биде клучен, а тоа се покажа против Шкендија, која според мене е најдобриот тим во Македонија и игра најквалитетен фудбал.
До нашите навивачи нема многу да им порачам – тие се нашиот дванаесетти играч. Очекуваме да дојдат во што поголем број и да нè бодрат до последната секунда. Дерби како ова може да се реши со една грешка или со гол во последните моменти, како што беше минатата сезона. Затоа ни е потребна поддршка сите 90 минути, а на крајот се надевам дека заедно ќе се радуваме на победата.“
Натпреварот меѓу Пелистер и Вардар се игра вечерва со почеток од 20:00 часот на стадионот „Петар Милошевски“ во Битола.
