Фаворитите одиграа според планот, Љуботен убедлив во дербито на 21. коло на Првата женска фудбалска лига.
Тетовскиот тим со 4:1 славеше над Каменица Саса во меч каде Улза Максути постигна хет-трик, а еднаш стрелаше Хава Мустафа, додека пак на „рударките“ погоди Бразилката Тчеури Харуми Гоја, која постигна гол против својот поранешен клуб.
По овој меч Љуботен преку соопштение најави крај на една ера, а ова беше последен меч со интернационалки.
Тиверија Брера сосема очекувано стигна до убедлив триумф над Кочани кој беше инфериорен противник откако струмичанки прокнижија победа со резултат од високи 6:0.
Данче Карпузовска и Розита Пецева беа двојни стрелци, а по еднаш погодија Никица Трендова и Ивана Илиева.
Очекувано и Истатов славеше на домашен терен над „фенерџијата“ Топ Гол, а мечот беше решен уште во првиот дел кога „истатовки“ преку Радица Чонева и Ана Нешковска имаа 2:0 на полувреме.
Во вториот дел од мечот кој се играше во Пржино, Елма Шемсовиќ постигна гол за конечни 3:0.
Лидерот Скопје со убедливи 3:0 го доби мечот со Речица откако за новиот шампион на Македонија стрелаа Кристина Крстева во 8. и 50. минута и Рабија Дервиши во 63. минута.
Во Струга немаше победик откако Ас Јунајтед и Вардар ги поделија бодовите играјќи 1:1. За домашниот тим погоди Јована Павловска во 4. минута, а пак Мила Наумовска во 79. минута ги постави конечните 1:1.
