Екипата на Овче Поле запиша убедлива и значајна победа на гостувањето кај Ударник, славејќи со 6-3 во еден од најатрактивните натпревари во Третата лига – Исток, одигран пред бројна публика во Пирава, во рамки на 16. коло.
Натпреварот понуди многу возбудувања, голови и резултатски пресврти, но клучниот момент се случи во второто полувреме, кога домаќините целосно паднаа во играта. Ударник не успеа да го издржи темпото, па за краток период прими неколку голови и практично се распадна, што гостите знаеја максимално да го искористат.
Најдобриот стрелец во шампионот Тоше Манов со три гола ја „искината“ мрежата на Ударник, двапати погоди Дарко Нацев, а еден гол имаше Давид Велковски. За домашниот тим трите гола ги постигна Марјан Костадинов.
Со оваа победа, Овче Поле дополнително се зацврсти на лидерската позиција и направи огромен чекор кон освојување на титулата, која носи бараж за пласман во Втората лига. Од друга страна, по овој пораз, амбициите на Ударник за првото место претрпеа сериозен удар и шансите се сведени на „нула“.
Во останатите натпревари, Тиверија славеше со 2-1 против Малеш со што трите бодови останаа во Струмица. Мичо Митревиќ погоди во 30. минута за водство на домаќинот на полувреме. Во вториот дел Михаил Гошевски израмни на 1:1 во 46. минута, а во 63. минута погоди Мите Благоевски за конечни 2:1.
Брегалница Делчево убедливо триумфираше со 5-1 над Дојранско Езеро, Христина Крстов имаше три гола, а двапати погоди Еди Мандак, а гостинот единствен стрелец во 42. минута беше Илија Иванов.
Сигурна гостинска победа забележа и Хоризонт Турново, кој со 0-3 го совлада тимот на Карбинци. Искусниот Дејан Блажевски постигна два гола уште во првите четири минути и го откажа Карбинци од борба за три бода. Во вториот дел Наум Блажевски ја стресе мрежата на Карбинци за конечни 0:3.
Екипата на Победа Валандово беше слободна во ова коло.
Трката за врвот влегува во завршница, а Овче Поле сè повеќе се наметнува како главен фаворит за шампионската титула. Победа Валандово со три меча помалку од лидерот од Свети Николе се надева да го стигне.
