Ракометарите на Охрид испишаа нова страница во клупската историја, пласирајќи се во полуфиналето на Купот на ЕХФ и влегувајќи меѓу европскиот ракометен крем. „Гладијаторите“ во драматичен реванш на домашен терен го совладаа Олимпијакос со 25-24 и со вкупен резултат обезбедија место меѓу најдобрите четири екипи во натпреварувањето.
Ракометарите на Охрид не го кријат задоволството од историскиот успех, но остануваат и самокритични пред новите предизвици.
Ексклузивно за Спортска Мрежа, своите впечатоци ги сподели пивотменот на Охрид, Николаос Лиапис.
Лиапис не го криеше задоволството од постигнатиот успех, потенцирајќи ја големината на победата против квалитетниот состав на Олимпијакос, но воедно посочи дека тимот има простор за напредок, особено во однос на осцилациите во играта. Тој предупреди дека во полуфиналето против Целје ќе биде потребна уште поголема подготвеност.
,,Најпрво, би сакал да му честитам на мојот тим, многу сум горд на нас- ова што го направивме е големо бидејќи Олимпијакос е одличен тим. Сметам дека резултатот од гостинскиот меч пресуди, и ни ја даде предноста кон полуфиналето. Нешто што треба да нè загрижи е тоа што некогаш имаме ,,две лица” во играта..ќе мора да работиме на тоа и да напредуваме, бидејќи сметам дека следниот меч ќе биде потежок од овој..играме против Целје- еден многу брз тим, ќе има многу директни дуели,што значи дека ќе мора да се подготвиме уште подобро за тој двомеч.”- изјави Лиапис за Спортска Мрежа.
Со овој историски успех, Охрид покажа дека има квалитет и карактер да се носи со најдобрите, а следниот предизвик за „гладијаторите“ ќе биде словенечкиот Целје во битката за финале. Останува да се види дали оваа генерација ќе продолжи да ја пишува најубавата европска приказна на клубот.
