Осмиот и последен круг од ТОП 8 фазата ќе ги одреди полуфиналните двојки во доигрувањето за место во Супер лигата.
Овој викенд ќе донесе и потврда како ќе изгледаат полуфиналните двојки преку кои ќе стартува третата и одлучувачка фаза во Првата македонска лига – плеј-офот.
Пред одигрувањето на последното осмо коло од ТОП 8 фазата, познати се четирите екипи кои ќе играат во доигрувањето за место кое догодина води во елитната суперлигашка конкуренција.
Но прашањето кое е отворено е, кои ќе бидат полуфиналните двојки?
Во овој момент, на позицијата број 1 која носи и најдобар распоред во доигрувањето, е екипата на Струмица 2001, која е на делба на првата позиција заедно со екипата на Соколи 1933.
Струмичкиот прволигаш има подобар меѓусебен скор, и победа на средбата во салата „Билјанини извори“ во Охрид, во недела (од 13.30 часот), им го носи првото место на струмичани.
Штипскиот прволигаш има гостување против екипата на Вардар. Победа во „Кале“ и пораз на Струмица 2001 во Охрид ќе ги остави штипјани на пол-позицијата.
Помали се шансите за првата стартна позиција за екипите на Бутел и на Борец баскет, затоа што имаат по една победа помалку во однос на првопласираните две екипи.
Оттука ќе треба(ат) порази на Соколи 1933 и на Струмица 2001, и победи на Бутел и на Борец баскет во последното коло, кои би донеле еден вистински фото-финиш.
Многу работи ќе бидат појасни и по одигрувањето на двата натпревари кои се играат во саботниот термин.
Во исто време, од 17.часот, Мега баскет ќе го дочека Борец баскет, додека пак во салата „Илија Хаџи Николов“ ќе играат Водно санс и Бутел.
