Ракометарите на ГРК Охрид се на чекор до историски успех на европската сцена, но пред нив е уште една голема задача – реваншот против Олимпијакос, кој ќе се одигра во преполната сала „Билјанини извори“.
Средниот бек на Охрид, Тилен Стрмљан нагласува дека и покрај предноста од првиот натпревар, тимот мора максимално сериозно да пристапи на реваншот. Тој потенцира дека Олимпијакос располага со квалитетен состав и опасни шутери, поради што неопходна е добра подготовка и високо ниво на ангажираност.
Стрмљан смета дека разликата од пет гола не е гаранција за успех, бидејќи во ракометот лесно може да се анулира. Затоа, клучот го гледа во борбеноста и дисциплината, како и во поддршката од трибините, за да се обезбеди уште една победа.
„Сигурно дека нè очекува уште еден тежок натпревар. Знаеме каква екипа е Олимпијакос, какви шутери има во својот тим. Нам ни преостанува што подобро да се подготвиме. Петте гола предност не значат ништо, во ракометот може многу лесно да се анулираат. Со максимална ангажираност и голема борба да дојдеме до уште една победа. Ги повикувам навивачите да дојдат во што поголем број и да бидат нашиот осми играч“- изјави Стрмљан.
Охрид ја има предноста, но и обврската да ја потврди на домашен терен. Со сериозен пристап и поддршка од публиката, „гладијаторите“ ќе се обидат да го направат последниот чекор кон европско полуфинале.
Салата е веќе целосно распродадена, што значи дека охридските ракометари ќе имаат осми играч од трибините, а охриѓани ќе имаат прилика да гледаат европски ракомет и да придонесат во одличната атмосфера викендов.
