Македонскиот шампион Еурофарм Пелистер продолжува со стратегијата за задржување на квалитетниот кадар, па така клубот официјално ја продолжи соработката со кружниот напаѓач Никола Граховац.
Иако релативно кратко време е дел од битолскиот состав, Граховац успеа да остави силен впечаток со своите настапи, што беше доволно за управата да реагира и да го обезбеди неговиот потпис и за следниот период. Новиот договор е со важност за сезоната 2026/27, со можност истиот да биде продолжен и за дополнителна година.
Хрватскиот интернационалец пред доаѓањето во Македонија настапуваше во неколку европски шампионати, градејќи искуство во Хрватска, Унгарија и Германија. Во редовите на Пелистер, тој ќе продолжи да биде важен дел од ростерот, особено на позицијата кружен напаѓач, каде заедно со македонските репрезентативци Жарко Пешевски и Самоил Ристевски ќе претставуваат сериозна сила.
Од клубот не го кријат задоволството од продолжувањето на соработката.
„Потребни ни беа само неколку натпревари да го забележиме неговиот квалитет и да констатираме дека Никола Граховац и Еурофарм Пелистер се создадени едно за друго. Затоа со задоволство ја запознаваме јавноста со новиот договор за сезоната 2026/27, со опција и за сезоната 2027/28. Граховац пред да дојде во Македонија настапуваше во Хрватска, Унгарија и Германија. Кружниот напаѓач и во иднина ќе ги радува нашите навивачи, а со македонските репрезентативци – Жарко Пешевски и Самоил Ристевски ќе формираат огромен капитал на една од клучните позиции во ракометната игра“, велат од РК Еурофарм Пелистер.
Со овој потег, битолчани јасно покажуваат дека сериозно ги градат амбициите и за следните сезони, задржувајќи го јадрото на тимот кој веќе носи резултати.
