Ракометарите на Вардар 1961 без поголеми проблеми го совладаа Охрид со убедливи 31-21 (17-12) во рамки на третото коло од плеј-офот во Суперлигата.
Натпреварот кој требаше да биде дерби, не го оправда очекувањето, откако гостинскиот тим настапи со значително изменет состав, со многу млади играчи, поради реванш дуелот против Олимпијакос во ЕХФ Европскиот куп.
Иако Охрид изненади на стартот и во неколку наврати имаше предност (3-5, 5-7), Вардар брзо ја презеде контролата и со серија голови направи пресврт, по што до крајот сигурно ја одржуваше предноста. На полувремето „црвено-црните“ имаа плус пет (17-12), а во вториот дел разликата постепено растеше до конечните десет голови разлика.
Најефикасен во редовите на Вардар беше Урош Митровиќ со 6 погодоци, додека Хориха додаде 4. Кај Охрид, најрасположен беше Дејан Кукуловски со 6 голови, а Никола Ристески постигна 4.
Со оваа победа Вардар останува лидер на табелата во плеј-офот и го потврдува статусот главен фаворит за титулата, додека Охрид вниманието го насочува кон европските предизвици.
