Младата репрезентација на Македонија до 21 година доживеа убедлив пораз на гостувањето кај Италија, откако загуби со 4:0 во рамки на седмото коло од квалификациите за Европското првенство.
Домаќините уште од самиот почеток го презедоа контролата врз играта и поведоа во третата минута преку Шер Ндур. До крајот на првото полувреме, македонската селекција успеа да се одбрани и да ја задржи минималната негатива.
Сепак, во вториот дел следеше пад во играта на нашите фудбалери. Италија за краток период постигна уште два погодоци преку Лука Липани и Џеф Екатор, со што практично го реши прашањето околу победникот. Конечните 4:0 беа поставени во 86. минута, кога Сејду Фини реализираше удар од белата точка.
По седум одиграни натпревари, Македонија има освоено три бода и се наоѓа на претпоследното место во групата Е.
