Во просториите на Општина Кавадарци се одржа состанок помеѓу градоначалникот Митко Јанчев и раководството на ГФК Тиквеш, на кој беше донесена важна одлука за иднината на клубската младинска школа.
На состанокот присуствуваа претседателот Миле Масларков, ко-сопственикот Цезер Браво, спортскиот директор Љупчо Трајковски, како и дел од родителите од младинската школа.
Клучната одлука од состанокот е назначувањето на актуелниот капитен на првиот тим, Александар Вареловски – Брзи, за нов координатор на младинската школа.
Покрај своите обврски како првотимец, Вареловски ќе има значајна улога во развојот на младите категории, следење на нивниот напредок и унапредување на тренажниот процес. Неговата задача ќе биде и да воспостави силна врска помеѓу младинската школа и сениорскиот тим, со јасна цел – создавање на нови првотимци за Тиквеш.
Од клубот изразуваат уверување дека со своето искуство, лидерство и посветеност, Вареловски ќе придонесе за дополнителен развој и успеси на младинската школа, која претставува важен сегмент во иднината на кавадаречкиот прволигаш.
