Башкими приреди вистинска драма во Куманово и со неверојатен пресврт го совлада Шкупи со 3-2, во меч од 24. коло во Првата македонска фудбалска лига. Иако кумановчани беа фаворити, до бодовите стигнаа на далеку потежок начин од очекуваното.
По мирното прво полувреме без погодоци, вториот дел донесе шок за домашниот тим. Шкупи за само две минути преку Зибери и Чајани обезбеди висока предност од 0-2 и најави сензација. Работите дополнително се искомплицираа за Башкими по исклучувањето на Ор, па кумановчани останаа со играч помалку.
Сепак, токму тогаш следеше целосен пресврт. Башкими заигра офанзивно и во краток период успеа да ја анулира негативата – Личина намали со глава, а веднаш потоа Ферати си постигна автогол за 2-2.
Кулминацијата дојде во самиот финиш, кога Рибеиро најдобро се снајде по центаршут и со глава го комплетираше пресвртот за голема победа од 3-2. Во судиското надополнување истиот играч погоди уште еднаш, но голот беше поништен поради офсајд.
Со овој триумф Башкими стигна до 35 бодови и прави крупен чекор кон обезбедување директен опстанок во елитата. Од друга страна, Шкупи останува закован на дното и веќе е извесно дека наредната сезона ќе настапува во Втората лига.
