Големиот успех на младите фудбалери на ГФК Неготино на меѓународниот турнир IFT Junior Cup во Сандански, Бугарија, доби и официјално признание од локалната самоуправа. По освоените три први и едно трето место, како и пет индивидуални награди, младите шампиони имаа прием во Општина Неготино.
На покана на градоначалничката на Неготино, Марија Нацева, во нејзиниот кабинет беа примени фудбалерчињата и нивните тренери, на кои им беа упатени честитки за извонредниот успех и достојното претставување на градот на меѓународната сцена.
„Денес на моја покана во кабинетот на Општина Неготино имаа прием шампионите на ГФК Неготино. Уште еднаш упатувам огромни честитки до дечињата и тренерите за постигнатите успеси. Се обврзувам дека секогаш ќе поддржувам млади, надежни спортисти во нашата општина. Честитки шампиони!“, истакна градоначалничката Нацева.
Инаку, младите фудбалери на ГФК Неготино забележаа извонреден настап на IFT Junior Cup, каде се натпреваруваа со генерациите 2013/2014, 2015, 2016 и 2018/2019, освојувајќи три први места, едно трето место и дури пет индивидуални признанија.
Генерацијата 2013/2014 го освои првото место, а од оваа екипа пристигнаа и две индивидуални награди. Димитар Филиповски беше прогласен за најдобар одбранбен играч, додека признанието за најдобар играч му припадна на Дарио Ставров.
Генерацијата 2015 го освои третото место, а Алексеј Димов беше прогласен за најдобар голман во својата конкуренција.
Уште една титула освои генерацијата 2016, а наградата за најдобар играч ја доби Влатко Темелковски.
До првото место стигна и најмладата генерација 2018/2019, а Максимилијан Апостоловски беше прогласен за најдобар напаѓач на турнирот.
Од клубот истакнаа дека се горди на своите млади фудбалери кои со борбеност, дисциплина и тимски дух успеаја да остварат историски резултат за фудбалската школа на ГФК Неготино и достојно да го претстават својот град на меѓународната сцена.
