Младиот борец Мирко Василев од радовишкиот клуб Мај Тај Адреналин оствари голем успех на Светскиот куп во Италија, кој се одржа под организација на WAKO федерацијата, освојувајќи бронзен медал во силна меѓународна конкуренција.
Василев настапи во дисциплината К1 во категоријата до 71 килограм и на патот до медалот забележа одлични борби. Во четвртфиналето радовишанецот беше убедлив против претставникот на Австрија, Перо Челебиќ, кого го совлада со чиста победа од 3-0 поени.
Василев потоа загуби од Германецот Диберт-Бекоj Патрик, со што обезбеди бронзен медал на ова престижно натпреварување, а под водство на тренерот Влатко Петров.
Конкуренцијата на Светскиот куп беше исклучително силна, со учество на врвни борци од голем број држави, што дополнително го прави успехот на младиот радовишанец уште позначаен.
Мирко Василев важи за еден од најперспективните млади борци од Радовиш и член на клубот Мај Тај Адреналин, каде со голема посветеност и напорна работа веќе бележи значајни резултати на домашната и меѓународната сцена.
По успешниот настап во Италија, клубот Мај Тај Адреналин од Радовиш го очекуваат нови предизвици во текот на 2026 година. Меѓу позначајните натпреварувања на кои се планира настап се Европскиот куп во Босна и Херцеговина, Светскиот куп во Унгарија, како и Европското првенство, каде радовишките борци повторно ќе се обидат да остварат нови врвни резултати.
