Актуелниот шампион Форца направи нов „кикс“ откако одигра 6:6 на воведниот меч против Шкупи, со што скопскиот тим освојува вреден бод во тешката битка за опстанок во Првата футсал лига.
Натпреварот за отварање на 12. коло понуди дури 12 погодоци, но без победник. Со често менување на резултат – за домашниот тим три погодоци постигна Артан Чилафи, а пак двоен стрелец беше Берат Рамадани, а еден гол беше дело на Јасир Зекири.
За гостинот по два гола постигнаа Еркан Сефери и Ербил Даци, а пак по еден гол постигнаа Зекир Зејнели и Абдил Кадир Јахја.
Во Велес беа постигнати седум гола за триумф на Кеги Моби од 4:3 над Мал Ајакс од Штип. Без погодоци помина првиот дел од мечот, сите голови паднаа во вториот дел.
Домаќинот стигна до водство од 4:0 преку двата гола на Трајче Трајков и головите на Димче Андов и Петар Левков, а потоа Давид Тошев со два брзи гола намали на 4:2, а конечниот резултат од 4:3 го постави Иса Дурмишов во 34. минута.
На натпреварот меѓу Јувентус Серава и Клими беа постигнати фантастични 16 погодоци, за моќна победа на домаќинот од 12:4.
Вечерва најрасположен за погодоци беше Армандо Алијевиќ кој за домашниот состав постигна четири погодоци, хет-трик имаше Омер Османи, а пак двоен стрелец беше Фуркан Шабани. По еден гол за скопскиот тим постигнаа Бејтула Јакупи, Керим Мамуд и Енез Јусуфи.
За гостинската екипа од Кавадарци двапати погоди Давид Крстески, а по еднаш Филип Грујоски и Виктор Аризанов.
Утре се игра мечот меѓу дебитантот Балкан и непоразениот лидер Проект од Јосифово, а колото ќе биде затворено во понеделник со мечот меѓу Бутел и Осогово.
