Радовиш доби нова кик-бокс приказна за паметење. Клубот по маи таи и кикбокс Адреналин од Радовиш блесна на своето прво учество на Државното првенство кое викендов се одржа во спортскиот центар „Јане Сандански“ во Скопје, освојувајќи повеќе медали и испраќајќи силна порака дека станува збор за нов сериозен фактор на македонската сцена.
По триумфот во Пукет, Тајланд, радовишките борци ја продолжија победничката низа и на домашен терен. Иако за дел од нив ова беше прво официјално искуство на државен шампионат, во рингот настапија самоуверено, дисциплинирано и со шампионски менталитет.
Првото злато во клупската историја на државни првенства го освои Ефтерпи Димитрова (10 г.) во дисциплината кик лајт до 37 килограми, која славеше со прекин во втората рунда, демонстрирајќи целосна доминација.
Шампионската серија ја продолжија:
- Спас Димитров (9 г.) – кик лајт (-37 кг)
- Љупчо Крстев (17 г.) – К1 (-81 кг)
- Милан Тасевски (16 г.) – К1 (-60 кг)
- Мите Крстев (18 г.) – К1 (+84 кг)
Со ова Адреналин освои вкупно пет златни медали, што е импресивен биланс за дебитант на државната сцена.
Успехот беше надополнет со две сребрени одличја, кои ги освоија Ердем Мехмед (12 г.) во кик лајт (-37 кг) и Виктор Јованов (16 г.) во К1 (-67 кг).
Бронзен медал освои Неџмедин Мехмед (11 г.) во кик лајт (-37 кг), додека Василиј Ѓорѓиев (10 г.) заврши на четвртото место во категоријата над 47 килограми, заокружувајќи го одличниот настап на младата радовишка екипа.
Овој резултат претставува огромен чекор напред за клубот, кој со посветена работа и континуирани настапи на меѓународна сцена веќе гради препознатливо име.
- Фокусот сега е ставен на Светскиот куп во Италија
Нема многу време за славење. Следниот голем предизвик е Светскиот куп на World Association of Kickboxing Organizations, кој овој месец ќе се одржи во Јесоло.
Македонија ќе ја претставува шампионот Мирко Василев, кој влегува во завршната фаза од подготовките со висок интензитет и јасна цел – достојно да ги брани боите на клубот и државата на една од најпрестижните светски сцени во кик-боксот.
Од Адреналин порачуваат дека ова е само почеток на сезоната исполнета со големи предизвици, силна конкуренција и нови можности за докажување. Со ваква генерација млади, мотивирани и амбициозни борци, радовишкиот клуб најавува дека неговото време допрва доаѓа.
