Младите македонски тенисери до 14 години се меѓу учесниците на развојните шампионати што се одржуваат во Анталија, Турција. Годинава боите на Македонија ги бранат Андреј Темов и Василиј Закоски во машка конкуренција, како и Деа Крстевска и Ведрана Танеска во женска.
За време на престојот во Анталија ќе се одиграат два турнира, а натпреварите од првиот започнуваат денеска. Во првото коло Андреј Темов, кој е поставен за четврти носител, ќе биде слободен, додека Василиј Закоски ќе се соочи со Самвел Геворгијан од Ерменија.
Кај девојчињата, Деа Крстевска во воведната рунда ќе игра против Јамила Хусензаге од Азербејџан, а Ведрана Танеска ќе ги одмери силите со Раниа Хаџиева, исто така од Азербејџан.
Делегацијата ја предводат јуниорскиот капитен Круно Деспотовски и неговата заменичка Тања Стојановска, кои ќе им бидат поддршка на младите тенисери на овој меѓународен настап.
