Пионерската екипа на РК Радовиш успешно ги одработи зимските подготовки и максимално подготвена ќе го дочека пролетниот дел од сезоната во Пионерска ракометна лига на Македонија.
Под водство на тренерот Игор Конзулов, младите ракометари минаа низ сериозен и квалитетен тренажен процес. Дел од подготовките беа реализирани во спортската сала при гимназијата „Коста Сусинов“ во Радовиш, а дел во Спортско-рекреативниот центар „25 Мај“, каде што пионерите работеа на физичка подготвеност, техничко-тактички елементи и тимска игра.
Конзулов е добро познато име во ракометната јавност. Поранешен ракометар на Радовиш, а подоцна и дел од управата на клубот во периодот кога тимот се натпреваруваше во Суперлигата, денес е посветен на создавање нова генерација која во иднина ќе го носи сениорскиот дрес.
Во изминатите години дел од ракометарите од поранешните генерации заминаа во странство или во други клубови, а некои ја прекинаа кариерата, па затоа фокусот сега е ставен на работа со младите категории. Конзулов паралелно работи и со најмладите – деца на возраст од седум години, кои ги прават првите чекори во ракометот.
Како професор по спорт, тој максимално го вложува своето знаење и искуство во правилен раст и развој на децата, градејќи основа која треба да донесе идни младински и сениорски репрезентативци на клубот. Атмосферата на тренинзите е позитивна и мотивирачка, а бројката од 25 до 30 деца на секој тренинг е показател дека ракометот во Радовиш повторно добива силна база.
Овој масовен одзив е охрабрувачки сигнал дека клубот има иднина и дека преку континуирана работа со младите може повторно да создаде генерација што ќе биде столб на сениорскиот тим на РК Радовиш.
