Лесна, убедлива и рутинска победа за шампионот Ѓорче Петров, откако со 38:20 го доби Астибо во меч од 18. коло на ракометната Супер лигата во женска конкуренција.
„Лавиците“ воопшто не видоа мака и лесно триумфираа пред домашната публика, а гостинскиот тим парираше само во првите десет минути од средбата од 6:4 во 10. минута, Ѓорче Петров одлепи и на полувреме имаше 21:10.
Во вториот дел расположените „лавици“ ја полнеа мрежата на тимот од Штип.
Емилијана Ризоска со осум гола беше прво име кај Ѓорче Петров, а со по пет гола се истакнаа Марија Јанкуловска и Теодора Дукоска.
Кај Астибо прво име беше Жанет Вероника Мутемеца со девет гола, во отсуство на Марија Анчева, која не настапи на овој натпревар.
Утре, Чаир ќе се соочи со Спартак, додека пак в недела Куманово ќе игра против Вардар. Екипата на Пелистер овој викенд одмара бидејќи требаше да игра со откажаниот Металург Автокоманда.
