Новиот селектор Берокал дебитираше со победа против Луксембург. Во третиот натпревар од групата „А“ во претквалификациите за Евробаскет 2029, машката репрезентација на Македонија оствари убедлива победа против селекцијата на Луксембург.
Со овој триумф, „црвено-жолтите“ остануваат со максимален ефект по три кола – три натпревари и три победи, што ги задржува на лидерската позиција во групата.
Нашата селекција уште во првото полувреме изгради сигурна предност (44:32). Тимот прикажа стабилна игра во нападот, со солидна реализација за два поени (12/19 – 62%), додека за три поени шутираше 5/15 (33,3%). Беа запишани и 11 асистенции, а најмногу – шест, имаше Марин Петков.
По паузата, Македонија ја зголеми разликата и на +20 (54:34), но гостите успеаја да намалат до крајот на третата четвртина (59:49). Сепак, нашите кошаркари не дозволија неизвесна завршница – ја задржаа контролата и мирно го приведоа натпреварот до конечна победа.
Андреј Јакимовски беше најефикасен со 17 поени, дополнети со седум скока и четири асистенции. Ефремовски внесе свежина од клупата и натпреварот го заврши со 13 поени. Повратникот во националниот тим, Етан Хап, оствари дабл-дабл учинок од 15 поени и 14 скока.
Следниот натпревар Македонија ќе го одигра на 2 март во Баку против репрезентацијата на Азербејџан, во обид да ја продолжи победничката серија.
