Тиквеш ја продолжи позитивната серија оваа пролет и со победа се врати од гостувањето кај Македонија Ѓорче Петров (0-1) во рамки на 19. коло од ПМФЛ. Кавадарчани со новите бодови се искачија на седмото место на табелата и направија значаен чекор во борбата за опстанок.
Гостите беа поагресивни и поиницијативни во првото полувреме, но не најдоа начин да го совладаат расположениот Ристо Јанков, кој интервенираше во неколку наврати и ја одржа својата екипа во игра. Тиквеш дополнително се соочи со проблем поради повредата на капитенот Даниел Мојсов, кој мораше предвреме да го напушти теренот.
Во вториот дел динамиката се засили. Мрежата на домаќините се затресе по ударот на Сила, но погодокот беше поништен поради недозволена позиција. Сепак, тоа беше најава дека кавадарчани се поблиску до водство.
Одлуката падна во завршницата. По една акција по десната страна и мешаница во шеснаесетникот, топката се одби до Лусианињо, кој од непосредна близина ја испрати во мрежата и ги постави конечните 0-1.
До крајот „лавовите“ немаа вистинска реакција, па Тиквеш сосема заслужено ги однесе трите бода од Скопје. Со оваа победа тимот од Кавадарци има 24 бодови, додека Македонија Ѓорче Петров останува во опасната зона со 19.
