По големата победа над чешка Дукла Прага и обезбедениот пласман во четвртфиналето на ЕХФ Европскиот Куп, ракометарите на ГРК Охрид повторно го насочуваат фокусот кон домашниот шампионат.
Во рамки на 22. коло од Супер лигата, охриѓани му гостуваат на РК Пролет 62 во салата „Македонско сонце“, во последното коло пред стартот на плеј-офот. Натпреварот доаѓа во специфичен момент – веднаш по европскиот успех, но и пред завршниот дел од сезоната во кој секој бод ќе има огромно значење.
Во таборот на Охрид владее оптимизам, но и свесност дека нема простор за опуштање. Тимот сака позитивниот ритам од Европа да го пренесе и на домашната сцена, особено против противник кој традиционално знае да биде незгоден на свој терен.
Левото крило на охриѓани- Никола Ристески потенцира дека фокусот мора да биде на највисоко ниво и покрај заморот од згуснатиот распоред. Според него, Пролет е тим што знае да ја искористи поддршката од домашната публика, па затоа пристапот на Охрид ќе биде максимално сериозен.
„По победата над Дукла Прага утре ни следува натпреварот против Тинекс Пролет. Знаеме дека се незгодна екипа на домашен терен, затоа одиме максимално фокусирани да се вратиме среќни во Охрид.“- изјави Ристески.
Јасно е дека за охриѓани овој дуел претставува последна проверка пред плеј-оф битките. Победа во Скопје би значела дополнителен импулс и самодоверба пред најважниот дел од сезоната, каде амбициите се високи, како на домашна, така и на европска сцена.
