Фудбалскиот клуб Победа денес преку официјално соопштение информираше дека нема да продолжи со натпреварување во пролетниот дел од Втората лига. Веста силно одекна во јавноста и ги погоди не само фудбалските љубители, туку и сите оние кои на кој било начин биле поврзани со спортот.
Победа е еден од најголемите фудбалски брендови во Македонија, но и во поранешна Југославија. Поранешен шампион на Македонија, освојувач на Купот, клуб кој настапуваше во европските квалификации и остави длабока трага во македонскиот фудбал.
Најфудбалскиот град во Македонија останува без сениорски фудбал…
По објавата, социјалните мрежи беа преплавени со фотографии и спомени. Поранешни и сегашни фудбалери, тренери и спортски работници кои биле дел од клубот споделуваат моменти од времињата кога Победа беше во своите најславни години. Заедничката порака е јасна – без Победа, македонскиот фудбал не е ист.
Прашањето дали и кога Победа ќе се врати на големата сцена останува отворено.
Пред клубот следува тежок период во кој ќе биде неопходна целосна реорганизација, пред сè стабилизирање на финансиската состојба, за во иднина повторно да се создадат услови за натпреварување. Фактот што Победа нема да ја доигра сезоната значи и преселба во најнизок ранг – Општинската фудбалска лига – што дополнително ја отсликува тежината на моментот.
Последна сезона во која Победа доминираше и имаше високи амбиции беше во сезона 2021/2022 кога стана шампион во Втора лига – Исток, тоа беше последна сезона во која Втората лига беше поделена на Исток и Запад.
Следната сезона 2022/2023 Победа влезе во Прва лига, но тоа беше само епизодна улога и веднаш испадна од елитата во второлигашкото друштво, а од тогаш започнаа и проблемите и предизвиците околу функционирањето и опстојувањето на клубот. Во сезона 2023/2024 од амбиции за експресно враќање во Прва лига, Победа заврши на 14. место во Втора лига или во бараж зоната и славеше во баражот за опстанок против третолигашот Куманово и избори опстанок.
Поучени од катастрофалната сезона, Победа и минатата сезона за влакно избегна бараж, но успеа да стигне до директен опстанок, но оваа сезона одново тешки искушенија.
Пролетниот дел од Втората лига ќе продолжи без Победа, а Прилеп останува без својот миленик. Градскиот стадион „Гоце Делчев“ ќе остане празен, без песна, без навивачи и без клубот кој со децении беше симбол на градот…
Сепак, веќе денес се најавува можност за да се состави тим со кој Победа ќе ја доигра сезоната во Втора лига. Се’ уште клубот нема испратено известување до ФФМ дека се откажува од натпреварување, веќе се мобилизираат прилепчани со цел Победа да продолжи со натпреварување.
