Фудбалскиот клуб Македонија Ѓорче Петров продолжува активно да го склопува тимот за вториот дел од сезоната, а во таа насока ги ангажираше Стефан Лазаревиќ и Огузан Ајдоган.
Во дефанзивната линија повторно ќе го гледаме Стефан Лазаревиќ, кој по третпат во својата кариера го облекува дресот на „лавовите“. Десниот бек ја мина есенската полусезона во ФК Скопје, а претходно настапуваше и за Работнички. Лазаревиќ е дете на Македонија ЃП и токму во Ѓорче Петров ги има забележано и најмногу настапи во својата кариера. Покрај матичниот клуб, има играно и за Гостивар, Тетекс, Борец, Вардар и Силекс, што го прави еден од поискусните домашни дефанзивци.
Офанзивниот дел од тимот, пак, ќе биде збогатен со доаѓањето на Огузан Ајдоган, турски фудбалер со германски пасош, кој пристигнува по настапите за Башкими. Ајдоган веќе има искуство во македонскиот фудбал, бидејќи претходно настапуваше и за Гостивар, а зад себе има и интернационална кариера во Германија и Турција, каде играл за клубови како Карлсруе, Алеманија Ахен и Анкараспор. Дополнителна тежина на неговото CV му дава и младинското искуство во академиите на Шалке, Борусија Дортмунд и Бешикташ.
Со ангажманот на Лазаревиќ и Ајдоган, Македонија ЃП јасно испраќа порака дека сака поголема стабилност и поширок избор во сите линии, со цел успешно да ја води борбата за опстанок во Првата македонска фудбалска лига во пролетниот дел од сезоната.
