Во рамки на 19. коло од Супер лигата, со натпреварот против РК Прилеп, ракометарите на ГРК Охрид, утре, со почеток во 19:00 часот, го започнуваат вториот дел од сезоната. Охриѓани влегуваат во пеколен февруарски распоред, со низа важни натпревари, а првиот предизвик е на домашен терен во „Билјанини извори“.
Во продолжението од сезоната, клубот се засили со неколку нови имиња, а еден од новите адути е Ален Ќосевски, кој ќе биде дополнителна опција во ростерот на стручниот штаб.
По комплетниот тренажен процес и добро сработените подготовки, во таборот на ГРК Охрид владее позитивна атмосфера. Тимот делува свежо и мотивирано, а желбата е на теренот да се прикаже препознатлив, брз и борбен ракомет. Натпреварот ќе биде и уште една можност новите имиња во составот да се вклопат целосно во системот на игра.
Еден од новите ракометари во редовите на охридскиот клуб, Ален Ќосевски, истакнува дека подготовките поминале во одличен ритам, екипата е физички и ментално подготвена, а главната цел е ГРК Охрид да го прикаже својот најдобар ракомет пред домашната публика.
„Тимот се чувствува свежо, добро се подготвивме и очекувањата се да го одиграме нашиот најдобар ракомет.“ – изјави Ќосевски.
Поддршката од домашната публика ќе биде важен фактор за ГРК Охрид на стартот од вториот дел од сезоната, во период кога секој бод има дополнителна тежина. Амбициите и надежите се големи, а натпреварот со Прилеп е првиот чекор во серијата предизвици што ги очекуваат охриѓани во февруари.
