Ракометарите на Вардар 1961 го завршија настапот на меѓународниот турнир во Лабин со второто место, откако во финалната пресметка беа поразени од Загреб со 34-27. Хрватскиот шампион и овојпат ја потврди доминацијата на турнирот, освојувајќи го трофејот по четврти пат во низа.
Финалето понуди израмнета и борбена игра во првото полувреме. По почетните минути во кои резултатот се движеше гол за гол, двете екипи наизменично имаа свои моменти. Вардар успеа да воспостави кратка контрола со серија погодоци, но Загреб возврати и во финишот од првиот дел, користејќи ја играта со човек повеќе, обезбеди предност од 17-15 на паузата.
Клучниот период се случи во второто полувреме. Вардар се обиде да се врати резултатски и во еден момент се доближи на минус два, но следуваше серија грешки и промашувања кои Загреб знаеше максимално да ги искористи. Хрватскиот тим постепено ја зголемуваше разликата, стигна до убедлива предност и рутински го приведе натпреварот кон победа.
Во натпреварот за третото место, Слован Љубљана беше подобар од Сесвете и го комплетираше подиумот на турнирот во Лабин.
И покрај поразот во финалето, за „црвено-црните“ овој турнир беше важна проверка пред продолжението на сезоната. Вардар останува фокусиран на главната цел – домашното првенство, каде што ќе води жестока битка за шампионската титула со актуелниот првак Еурофарм Пелистер, Охрид и Алкалоид. Вториот дел од сезоната лидерот на табелата го отвора на домашен терен против Куманово, во натпревар во кој ќе влезе како апсолутен фаворит.
