Европската ракометна федерација (ЕХФ) направи измена во распоредот на бараж-натпреварите за пласман на Светското првенство 2027, откако при првичната ждрепка беше забележана процедурална неправилност која директно ја засегна македонската репрезентација.
Македонија, како носител во извлекувањето, според правилникот треба да ја има предноста реваншот да го игра на домашен терен. Сепак, при првата ждрепка редоследот на влечење на екипите доведе до спротивен распоред, со што нашата селекција требаше да биде гостин во вториот натпревар.
По реакциите и дополнителната проверка, од ЕХФ ја повторија постапката и го исправија пропустот. Со новата распределба, Македонија ќе го одигра првиот бараж дуел на гости против победникот од двомечот меѓу Украина и Словачка, додека одлучувачкиот реванш е закажан да се игра пред македонска публика во Скопје, на 16/17 мај. Првиот натпревар ќе се игра на 13/14 мај.
Со оваа корекција, македонската машка репрезентација доби можност пред своите навивачи да го брка јубилејниот, десетти пласман на светските ракометни првенства, што дополнително ја зголемува важноста на мајските бараж-пресметки.
Инаку, дебито на македонската репрезентација на Светските првенства беше во далечната 1999 година. Тогаш Светското првенство се играше во Египет, а Македонија заврши на 18. место. Низ историјата Македонија играше на СП во 1999 во Египет, потоа на СП 2009 во Хрватска, а потоа фативме континуитет со учество на СП 2013 во Шпанија, две погоди подоцна во Катар, па 2017 во Франција, во 2019 во Данска и Германија, 2021 година во Египет. Нашата репрезентација по осми пат учествуваше на СП 2023 во Полска и Шведска, како и на последното СП пред две години, а домаќини беа Хрватска, Данска и Норвешка.
Светското првенство 2027 година ќе се игра во Германија, предвидено е да започне на 13 јануари, а финалето е закажано за 31 јануари со учество на 32 ракометни репрезентации.
