Есенскиот шампион во Втората македонска фудбалска лига, екипата на Охрид, утре ги започнува подготовките за пролетниот дел од сезоната, каде популарните „рибари“ ќе водат борба да го потврдат првото место и како шампионите директно да обезбедат влез во Првата македонска фудбалска лига.
Според информациите на Спортска Мрежа, младиот стратег Ромео Кочоски утре ќе го има првиот собир со екипата за 2026 година, а како што дознаваме веќе се договорени неколку пријателски натпревари преку кои ќе се проверува формата, но сигурно е дека ќе има уште некој тест повеќе.
Според информациите на Спортска Мрежа, „рибарите“ ќе ја проверуваат формата со прволигашот Струга Трим Лум, Новаци и Тетекс.
Како што веќе пишуваше Спортска Мрежа, раководството на клубот ја заврши главната цел – да го сочува ростерот од есенскиот дел кој направи голем резултатски успех, а притоа и да ангажира две засилување. Како што претходно информиравме нови имињата се Благоја Спиркоски кој дојде од Кожуф и Давор Серафимов кој дојде од прволигашот Шкупи.
Во есенскиот дел популарните „рибари“ на Кочоски забележаа 11 победи, три ремија и само еден пораз, со најефикасен напад кој реализираше дури 38 гола и втора најдобра одбрана со примени десет гола, а притоа Иван Глигоров е најдобар стрелец во второлигашкиот шампион.
Пролетниот дел тимот на Охрид го отвара против Беласица на гостински терен во Струмица.
