Второлигашот Охрид заврши многу важна работа кога е во прашања тимот за пролетната полусезона. Целта на популарните „рибари“ е една – директен влез во Прва лига.
За да се оствари таа цел раководството на клубот изминатите денови водеше интензивни преговори и договори многу важна работа со што „рибарите“ ќе бидат во предност во однос на конкурентите.
Охрид го задржа тимот од есенската полусезона, тим кој направи големи резултати завршувајќи на првото место во есенскиот дел so 36 бодови на своето конто, еден повеќе од Шкендија Арачиново која е втора, а три повеќе од Брегалница која е трета.
Притоа, Охрид го имаше најдобриот напад со 38 погодоци, убедливо најдобар напад, а втора најдобра одбрана со примени десет погодоци, зад одбраните на Шкендија Арачиново и Брегалница кои примија по девет погодоци оваа есен.
Но, најважен момент е што Охрид го задржа тимот, играчите се задоволни од условите, од резултатите, од атмосферата, од работата во клубот, но и од управата, па така сите остануваат верни на клубот од градот покрај Охридското Езеро, иако имаше понуди за неколку играчи како Иван Глигоров и Антонио Каланоски кои беа на мета на неколку клубови. Глигоров е најдобар стрелец на Охрид, но и во Втората лига, а искуството на Каланоски е многу важно за „рибарите“ на патот кон Прва лига.
Во есенскиот дел на голот беше Дамјан Серафимов, искусен голман кој веќе сезони наназад важи за еден од најдобрите во второлигашкиот шампионат, негови замени се младите Ненад Пентелашоски и Диел Доко, во дресот на Охрид остануваат Мартин Ѓорѓиевски, Игор Јаневски, капитенот Филип Ѓоргоски, Бојан Затуроски, Албнор Каба, Ангел Крстески, Иван Глигоров, Антонио Каланоски, Ерен Парталко, Виктор Наумовски, Стојан Попоски, Наумче Бакрачевски.
Тука се и младите Енсал Рашид, Андреј Ристовски, Марко Мирчески, Леонид Кофиловски, како и Димитриј Попоски, Димитриј Димитриевски и Благојчо Буџакоски.
Како што веќе објави Спортска Мрежа прво зимско засилување е Благоја Спиркоски кој пристигна од Кожуф, фудбалер со околу 150 настапи во Првата лига.
Дополнително, според информациите на Спортска Мрежа во моментот клубот води преговори со уште двајца до тројца играчи кои би требало да го засилат Охрид за пролетните предизвици.
Зошто Охрид е во предност во однос на конкурентите? Фактот што се задржи тимот од есенската полусезона ја потврди позитивната атмосфера во тимот и задоволството на сите играчи да останат да бидат дел од тимот кој сака влез во Прва лига. Тимот зад себе има одлични резултати во есенскиот дел, а дополнително истиот добива на квалитет за пролетниот дел. Шкендија Арачиново промовираше три засилувања досега како што веќе објави Спортска Мрежа, голманот Антонио Столевски, Владимир Жоглев и Махир Ајрули, додека Брегалница засега е пасивна и нема никакви знаци од тимот, веројатно ќе се активира клубот после Нова година, додека пак Беласица води преговори за неколку засилувања, а се раздели со Анатолиј Петејчук.
