Македонската ракометна репрезентација ремизираше со Швајцарија откако одигра 29:29 на последниот натпревар од „Жолтиот куп“ кој се играше во Винтертур.
Овие натпревари беа пријателски со цел да се провери формата пред настапот на Европското првенство. Капитенот на ракометната репрезентација на Македонија, Филип Кузмановски, зборуваше за натпревари на „Жолтиот куп“.
„Пред се сакам да им се заблагодарам на мојата екипа за борбеноста на овој турнир, мислам дека тие се најзаслужни за мојата награда. Мислам дека тие многу придонесоа за нашите цели што ги замисливме пред почетокот на турнирот ги исполнивме. Нашата формата ни расте од првиот натпревар до последните, а имаме уште краток период да се спремиме пред тоа што навистина не очекува во Данска. Некои детали ќе треба да се поправат пред почетокот на Европското првенство. На овие три натпревари ги пробавме сите формации во одбраната имаме некои новости како ќе парираме со нашите противници на Европското првенство. Треба да ни биде клучна одбраната, навистина треба да бидеме борбени, да играме еден за друг како овие натпревари што одигравме во второто полувреме со Украина и со Швајцарија. Навистина бевме мобилизирани сите заедно, пробуваме исто да биде на наша страна полуконтрата. Оваа Македонија треба да трча, нормално со полуконтрата сега ракометот е модерен и има многу трчање, мислам дека сме максимално подготвени и ќе одговориме на тоа темпо што ќе не очекува на Европското првенство“, рече капитенот Филип Кузмановски.
Македонија на „Жолтиот куп“ славеше над Бахреин и Украина, а ремизираше со Швајцарија. Сега нашата репрезентација ќе се „пресели“ во Хернинг, каде ќе ги играме натпреварите од групата Б на Европското првенство, а во група сме со Данска, Португалија и Романија.
