Второлигашот Шкендија Арачиново интензивно работи на засилување на играчкиот кадар во пресрет на продолжението од сезоната, со јасна цел да одговори на високите амбиции во Втората македонска фудбалска лига. Од клубот информираат дека раководството е постојано ангажирано во разговори со неколку квалитетни фудбалери, со кои се очекува дополнително да се засили конкуренцијата во тимот.
Подготовките за пролетниот дел официјално ќе започнат во понеделник, на 12 јануари. Фокусот ќе биде ставен на физичката подготвеност, тактичката уиграност, со цел екипата максимално подготвена да го дочека продолжението на шампионатот.
Зимскиот преоден рок донесе големи промени во ростерот, откако клубот се раздели со дури 13 фудбалери како што пишуваше Спортска Мрежа, а воедно ангажираше пет нови имиња. Во редовите на Шкендија Арачиново пристигнаа голманот Антонио Столевски, како и Сухејб Рушити од Слога Виница, Махир Ајрули од Каменица Саса, Владимир Жоглев од Осогово и Зани Назифи од Шкупи.
По есенскиот дел од сезоната, Шкендија Арачиново се наоѓа на второто место на табелата со 35 освоени бодови, само еден помалку од лидерот Охрид, што дополнително ја потврдува сериозноста на клубските амбиции во борбата за врвот.
