Селекторот на машката кошаркарска сениорска репрезентација на Македонија, Марјан Илиевски, ќе располага со опција помалку во бековската линија за претстојните претквалификации за Евробаскет 2029. Од лекарскиот тим беше потврдено дека Бобан Стајиќ има проблеми со левото колено и нема да може да настапи на дуелите со Азербејџан и Ирска.
„И покрај сите настојувања од негова страна да биде со тимот, нашиот лекарски тим процени дека Стајиќ не може да биде максимално подготвен за двата натпревари кои следуваат оваа недела. Не сакам да форсираме ништо во таа насока. Потребна му е комплетна рехабилитација. Имаме опција помалку во бековската линија, но продолжуваме понатаму“, изјави селекторот Илиевски на почетокот од мини-подготовките за квалификациските дуели.
Македонија прво ќе игра дома, на 27 ноември од 19 часот, во салата на СРЦ „Кале“ против селекцијата на Азербејџан.
Потоа, три дена подоцна — на 30 ноември — нашиот национален тим гостува во Даблин на натпреварот против Ирска.
