По тесниот пораз во Шведска, Вардар се враќа дома, подготвен за ново дерби од групната фаза на ЕХФ Европската лига. Во вторник во 18:45 часот, „црвено-црните“ го пречекуваат Кристијанштад во СЦ „Јане Сандански“ и бараат победа која ќе ги врати на врвот на табелата и ќе ја врати самодовербата пред домашната публика.
Тренерот на Вардар, Иван Чупиќ, нагласува дека главните аспекти за подобрување се дисциплина во трчањето, намалување на техничките грешки и поддршката од домашната публика. Вардар мора да се врати на победнички пат и да одигра како фаворит пред своите навивачи.
„Нè чека реванш со Кристијанштад. Иако немавме многу време меѓу натпреварите, направивме добри тренинзи и одигравме детална анализа. Нападот 6 на 6 беше добар, но имавме многу технички грешки во транзиција и во трчањето – токму тоа го казнуваат скандинавските екипи. Една од главните задачи е поголема дисциплина во трчањето. Пред нашата публика мора да важиме за фаворит и да одиграме за победа. Ги повикувам навивачите да направат вистинска атмосфера и да ни помогнат да ја освоиме првата позиција.“
Чупиќ додава дека фокусот е чекор по чекор, почнувајќи од овој меч, и дека по зимските подготовки очекува Вардар да биде уште посилен и подготвен да се бори за највисоките цели.
„Сакаме да се вратиме по серијата без пораз што ја прекинавме во Шведска. Чекор по чекор – прво овој меч, па потоа следните два. По зимските подготовки очекувам Вардар да биде најдобар од февруари до јуни. Свесен сум каде сум дојден – Вардар секогаш мора да победува.“- изјави Чупиќ.
Вардар е подготвен за реванш пред домашната публика, со јасна стратегија и дисциплина како клучни фактори за победа. Сите очи ќе бидат свртени кон СЦ „Јане Сандански“ во вторник, каде „црвено-црните“ ќе бараат три бода и враќање на врвот на табелата.
