Фудбалскиот клуб Пелистер изрази големо незадоволство по натпреварот со Вардар во рамките на 12. коло од Првата македонска фудбалска лига, кој заврши со победа на скопскиот клуб (1-2).
Битолчани на своите официјални канали објавија фотографии од новореновираната јужна трибина, каде што беа сместени навивачите на Вардар – „Комити“. На нив, како што наведуваат од клубот, може да се види материјална штета: налепници и потписи на седиштата, скршени и запалени столчиња.
Од Пелистер соопштија дека, поради ова, но и поради однесувањето на управата на Вардар, навивачите и делегацијата на скопскиот клуб повеќе нема да бидат добредојдени на натпреварите во Битола. Дополнително, од клубот реагираа и на присуството на, како што велат, вооружано обезбедување во ВИП-секторот кое било дел од придружбата на раководството на Вардар.
„ФК Пелистер ја известува јавноста дека дел од столчињата и трибинскиот простор на јужната трибина, каде што се наоѓаа навивачите на Вардар на натпреварот Пелистер – Вардар на 5 ноември се оштетени и сквернавени. Заради заштита на нашиот стадион во иднина нема да дозволиме присуство на гостински навивачи на стадионот „Петар Милошевски“.
Исто така сакаме да ги апострофираме некоректните изјави на одредени медиуми и постови на социјалните мрежи на високи претставници на ФК Вардар, кои иницираат омраза и инциденти. Ако на ова го додадеме присуството на големо обезбедување на извршниот директор на Вардар, минатата година и наоружано, во свечената ложа на стадионот Петар Милошевски, одлучивме да ги прекинеме институционалните односи со ФК Вардар.
Ваквиот принцип не е наш принцип и не сакаме да бидеме дел од ваков однос и соработка. За оваа управа на ФК Вардар нема повеќе место на нашиот стадион, во нашата свечена ложа, во нашиот ВИП простор. Пелистер ќе го почитува секој оној што ќе покажи почит кон Пелистер.
Во случај на промени и поставување на соодветни лица, достојно за имиџот и традицијата на ФК Вардар, спремни сме да подадеме рака на соработка“, стои во соопштението на пелистерци.
