Машката одбојкарска репрезентација на Македонија и домаќинот Бугарија на 9 септември, со почеток во 19 часот, во Софија ќе го отворат Европското првенство 2026, во рамките на групата А. Европската одбојкарска конфедерација го објави комплетниот распоред за претстојниот континентален собир.
Според распоредот, Македонија ќе биде слободна на 10 септември, а во второто коло, на 11 септември (16:00 ч.), ќе се соочи со Украина. Потоа следува уште еден ден пауза, пред дуелот од третото коло против Полска, кој ќе се игра на 13 септември во 19:00 ч.
На 14 септември нашите одбојкари повторно ќе имаат ден за одмор, а потоа на 15 септември (16:00 ч.) ќе се сретнат со Португалија. Групната фаза Македонија ќе ја заокружи на 16 септември, во ист термин, против Израел.
Најдобрите четири екипи од секоја група ќе обезбедат пласман во осминафиналето на Европското првенство.
Ова ќе биде четврто последователно учество на машката сениорска репрезентација на Македонија на еден континентален шампионат.
ЕвроВолеј 2026 ќе се одржи од 9 до 26 септември 2026 година, а организатори се Италија, Бугарија, Финска и Романија.
- Македонија – Бугарија – 09.09.2026
- Македонија – Украина – 11.09.2026
- Македонија- Полска – 13.09.2026
- Македонија – Португалија – 15.09.2026
- Македонија – Израел – 16.09.2026
