Фудбалската федерација на Македонија продолжува со континуираната поддршка на женските фудбалски клубови во рамките на системот на натпреварување на Федерацијата. Во склоп на програмата за развој и поддршка на женскиот фудбал, денеска беше реализирана донација на опрема и фудбалски топки за вкупно 23 клубови кои активно учествуваат во натпреварите во сите возрасни категории.
Секој клуб доби комплет за тренинг кој вклучува маици, шорцеви и тренерки, како и по десет фудбалски топки. Со оваа иницијатива, ФФМ уште еднаш ја потврдува својата посветеност кон подобрување на условите за работа и развој на младите фудбалерки, со цел женскиот фудбал во Македонија да продолжи да расте и да се развива на професионален и организиран начин.
Генералниот секретар на ФФМ Леонид Јандреоски истакна дека оваа активност е дел од стратегијата за развој и поддршка на женскиот фудбал.
„Континуирано вложуваме во инфраструктурата, едукацијата и опремата на клубовите кои работат со македонскиот фудбал. Нашата цел е секоја девојка во Македонија која сака да тренира фудбал да има еднакви услови, квалитетна опрема и поддршка од ФФМ. Веруваме дека ваквите проекти придонесуваат за стабилен и одржлив раст на женскиот фудбал.“
ФФМ и во иднина ќе продолжи да реализира активности и проекти насочени кон поддршка на клубовите, тренерите и фудбалерките, како дел од своите заложби за развој на поквалитетна и конкурентна женска фудбалска лига.
