Екипата на Истатов е прва која успеа да ја запре победничката форма на шампионот Љуботен, по девет победи во низа дојде првото реми, откако двете екипи во Пржино одиграа 2:2 и ги поделија бодовите, но „истатовки“ беа блиску и до триумф над шампионот.
По само една минута гостинот од Тетово преку Ајури Тераваки дојде до предност и водство од минимални 0:1, а домашниот тим кој го предводи искусниот стратег Кирил Изов дојде до израмнување на 1:1 со голот на Ива Здравевска која беше прецизна во 32. минута.
Во вториот дел се склучи и комплетен пресврт и тимот на Изов имаше водство од 2:1, со голот на Катерина Петкова во 61. минута. Сепак, по пет минути игра капитенот Александра Марковска постигна погодок за конечни 2:2 и делба на бодовите.
Ивана Илиева го реши натпреварот во Струмица со што трите бодови остана дома, откако Тиверија Брера со минимални 1:0 славеше над Топ Гол.
Фаворитот Скопје лесно се справи со Кочани на гостински терен откако го доби со 0:3. Победата беше најавена во финишот на првиот дел кога стрелаа Рабија Дервиши и Мила Панева, но веќе во 43. минута Христина Гоговска си постигна автогол за водство на гостинот од 0:3.
Во вториот дел мрежите мируваа, па резултатот од првиот дел стана конечен.
Каменица Саса со убедливи 9:1 го декласираше составот на Речица на домашен терен, во меч каде капитенот Ана Димитровска доминираше и ја тресе мрежата на противникот со постигнати пет погодоци, а по еден гол за „рударките“ постигнаа Туане Де Соуза Фрагосо, Тчеури Харуми Гоја, Драгана Костова и Христина Јовановска. За гостинскиот тим Емили Митковска беше единствениот стрелец која погоди во 71. минута од натпреварот.
Вардар немаше сили да направи изненадување против фаворитот Ас Јунајтед, па така струшкиот тим со 1:2 забележа нова победа.
Јована Павловска во 28. минута го отвори мечот за водство од 0:1, а веќе во 33. минута резултатот беше 0:2, откако гол постигна Ана Беатриз Тарантино Гилхермино Салино.
Во вториот дел гостинот од Струга остана без играч помалку на теренот, откако во 58. минута Кристина Мојсоска заработи директен црвен картон.
Во 83. минута Теодора Јанковска погоди за ублажување на поразот на 1:2.
Во однос на самата табела на врвот останува Љуботен со 28 бодови, Скопје сега е втор со 27 бодови, а пак на третата позиција е Тиверија Брера која има 21 бод. На 4. место е Ас Јунајтед со 19 бодови, следува Саса како пета со 18 бодови, а пак Истатов е шести со 16 бодови.
Веднаш пресек на табелата со тоа што Вардар е седми со 5 бодови, Топ Гол, Речица и Кочани имаат по четири бодови и се наоѓаат во долниот дел од табелата.
