Македонската машка ракометна репрезентација забележа победа од 29-27 против селекцијата на Јапонија на првиот контролен натпревар одигран во спортската сала „Автокоманда“ во Скопје.
Средбата се одигра без присуство на публика, во тест формат, со што селекторот Кирил Лазаров имаше можност да провери повеќе играчи и различни тактички решенија пред претстојните обврски на националниот тим. Македонските ракометари одиграа ангажирано во двата дела од натпреварот, а во завршницата успеаја да ја сочуваат минималната предност и да ја потврдат победата.
Овој контролен меч беше прв во рамките на тековната ЕХФ недела, а Лазаров го искористи за да ги тестира и помладите ракометари кои добија значајна минутажа.
Вториот пријателски дуел меѓу Македонија и Јапонија ќе се одигра во сабота (1 ноември) во Куманово, овојпат пред публика, со почеток во 16:00 часот. Овие натпревари се дел од подготовките на репрезентацијата за настапот на Европското првенство, кое во јануари ќе се одржи во Данска, Шведска и Норвешка.
