Ракометарите на ГРК Охрид ги очекува густ распоред во ноември, со серија натпревари во Суперлигата и двојни дуели во рамки на ЕХФ Европскиот куп. Екипата ќе одигра вкупно седум натпревари во период од 5-ти до 30-ти Ноември.
Охриѓани го отвораат месецот на 5-ти Ноември со гостување кај РК Бутел, а три дена подоцна, на 8-ми Ноември, ќе бидат домаќини на РК Пролет 62.
Следува уште еден домашен натпревар – на 12-ти Ноември против силниот РК Алкалоид, што ќе биде и последна проверка пред европските предизвици.
Во рамки на ЕХФ Европскиот куп, охридскиот состав ќе се сретне со РК Слога Добој од Босна и Херцеговина. Првиот меч ќе се игра во Охрид на 16-ти Ноември, а реваншот е закажан за 22-ри Ноември во Добој.
Во меѓувреме, во домашното првенство, избраниците на Охрид ќе гостуваат кај РК Струга во периодот од 13-ти до 19- ти Ноември, а месецот ќе го заокружат со дуел против РК Вардар 1961 на 30-ти Ноември на домашен терен.
Дефинитивно, месец ноември ќе биде месец на големи предизвици за ГРК Охрид. Тимот ќе се обиде да ја задржи добрата форма на домашната сцена и истовремено да направи исчекор во европските натпреварувања.
