Со два натпревари денес се комплетираше 6. коло во Трета лига – Запад, откако како што извести Спортска Мрежа вчера се одиграа четири натпревари.
Вардар Брвеница на свој терен и пред своја публика дојде до голем триумф од 4:0 над Велазерими од Слатино. Даниел Радески во 41. минута постигна гол за 1:0 на полувреме, а во вториот дел домашниот тим постигна уште три гола во мрежата на новиот третолигаш.
Синиша Јованоски и Бојан Михајловски постигнаа два брзи гола, а веќе во 79. минута Славче Антовски ги постави конечните 4:0.
Доброшти на домашен терен доживеа пораз од Зајази во меч со пет гола за конечни 2:3.
Гостинот по само седум минути игра дојде до предност од 0:1 со голот на Агон Хашими, а домаќинот преку Сулимани израмни на 1:1 во 24. минута. Во второто полувреме двете екипи имаа егал борба за трите бодови, домаќинот преку Гафури направи пресврт и водство од 2:1 со гол од пенал. По само една минута игра Хашими со втор гол израмни на 2:2, а во 83. минута судијата Пларент Салихи покажа на белата точка, а Шќиприм Руфати беше прецизен за конечни 2:3.
