По европскиот успех над ирскиот Шелбурн, фудбалерите на Шкендија со голема самодоверба го дочекуваат дербито против Вардар во рамките на Првата македонска фудбалска лига. Победата во Лигата на Конференции донесе дополнителна енергија и мотив кај тетовските „црвено-црни“, кои на домашен терен ќе се обидат да продолжат со позитивната серија и во домашното првенство.
Еден од клучните фудбалери на тетовскиот состав, Арбин Зејнулаи, во пресрет на дербито истакна дека тимот е целосно фокусиран на следниот предизвик и дека триумфот во Европа веќе е зад нив.
„Зад нас е историски натпревар во Европа, а после победата бевме многу среќни. Сепак, фудбалот не завршува туку веднаш мораме да се фокусираме кон следните предизвици. Сега на ред е мечот со Вардар, и затоа немаме многу време за славење. Мораме да се фокусираме кон следниот предизвик, а следниот меч за нас е дерби. Вакви дербија мора да се добијат, и ние сме максимално подготвени. Шкендија има амбиции да биде шампион, и кога тоа е целта, тогаш мора на секој натпревар императив да ни бидат трите бода. Што се однесува до дербито, само ќе кажам дека вакви дербија не се играат, туку се добиваат“, рече Зејнулаи.
Шкендија моментално се наоѓа во одлична форма и со победа против Вардар може дополнително да ја зацврсти својата позиција во горниот дел од табелата, пред продолжението на првенството и новите европски предизвици.
