Пред големото дерби од 7. коло на Првата ракометна лига меѓу Младост и Мулти Есенс, кое ќе се одигра во сабота од 19 часот во салата „Млаз“ во Богданци, во таборот на Младост владее оптимизам и голема мотивација. Дуелот е меѓу двете екипи кои досега немаат пораз и се главни конкуренти за местата што водат во Суперлигата.
Едно од најинтересните засилувања на Младост оваа сезона е бразилскиот пивотмен Жоао Габриел Диас Гекас, кој за кратко време се наметна со својата физичка подготвеност, техничка зрелост и исклучителна професионалност. Во пресрет на дербито, Гекас зборува за својата адаптација, животот во Македонија и очекувањата со новиот клуб.
- Адаптацијата и животот во Македонија
„Се адаптирам многу добро, дури и побрзо отколку што очекував, кон клубот, лигата и земјата. Луѓето кои се грижат за нашиот престој се неверојатни, а граѓаните на Богданци се многу отворени и пријателски настроени“, вели Бразилецот.
„Мојот најголем предизвик е јазикот – можам да комуницирам на англиски, но сакам да го научам македонскиот. Ми се допаѓа животот овде – безбеден, развиен, а храната е одлична. Мојот омилен специјалитет е пастрмајлија.“
- Рутината на еден професионалец
„Мојата дневна рутина е обемна. Се будам помеѓу 6:30 и 7:00, го земам првиот оброк и суплементите во 7:30. Во деновите со два тренинзи, во 8:50 заминувам кон салата и возам 15 минути. Секогаш се трудам да пристигнам порано за дополнителна мобилност и зајакнување. Првиот тренинг е во 9:30, потоа следат 50 минути во теретана, мал оброк околу 11:15 и ручек со групата во 13:00. Следи одмор до вториот тренинг во 18:30.“
Со ваква дисциплина, не е изненадување што Диас Гекас за кратко време стана пример за младите ракометари во Богданци.
- Поддршката на фановите
„Играњето пред големи, прекрасни и фанатични навивачи е неверојатно. Тие ни даваат многу мотивација и енергија за време на натпреварите и се клучни за нашите победи. Сакаме да донесеме радост на сите кои го полнат стадионот на нашите натпревари.“
Навивачите на Младост важат за едни од најверните во лигата, а токму салата „Млаз“ ќе биде исполнета до последно место во сабота, кога Гекас првпат ќе го доживее вистинското дерби со клубот.
- Историјата и очекувањата од клубот
„Кога дојдов во клубот, бев информиран за неговата традиција и престиж – со многу години историја, како на национално, така и на интернационално ниво“, додава играчот. „Нашите очекувања се најдобри – сакаме да останеме непобедени. Секојдневно работиме напорно за да дадеме 200% на теренот, а ова нема да биде поинаку пред нашите фанови, кои сигурно ќе бидат тука за да ни помогнат да оствариме уште една победа во лигата.“
- Кој е Жоао Габриел Диас Гекас?
Прволигашот Младост од Богданци уште еднаш ги потврди своите високи амбиции за враќање во Суперлигата по неколку сезони пауза. Во таа насока се движат и засилувањата на тимот, а последното доаѓа од Бразил.
Жоао Габриел Диас Гекас е 23-годишен пивотмен, поранешен младински репрезентативец на Бразил, кој настапувал во силната бразилска лига. Во Богданци пристигна од клубот Сао Каетано, каде што минатата сезона беше еден од најдобрите играчи.
