Овој викенд, Даниела Алексовска повторно ќе ја претставува Македонија на Светското ММА Првенство кое ќе се одржи во Тбилиси (Грузија).
Само две недели по спектакуларната победа на „АРМАДА 14“ во Скопје, со која триумфира со армбар уште во првата рунда, Алексовска повторно ќе влезе во кафезот, овој пат на највисокото светско ниво.
Таа ќе настапи во категоријата до 52.2 кг, каде што моментално е рангирана на третото место во светот. Ова ќе биде нејзино второ учество на Светско првенство, откако минатата година во Узбекистан успеа да освои бронзен медал и да донесе голема радост за Македонија.
Во Грузија, Алексовска ќе има сериозна конкуренција – ривали од Украина, Казахстан, Мексико и Азербејџан.
Таа заедно со својот тим „The Strongest Скопје“, претседателот на Македонската ММА Федерација Ивица Алексовски и тренерот Стефан Пецевски, Даниела заминува на светско првенство решена да го освои златото и да се врати со медал во Македонија.
