Македонската тенисерка Лина Ѓорческа го заврши своето учество како финалистка на силниот W75 турнир во Букурешт, кој се играше за награден фонд од 60.000 долари. Во борбата за титулата, Ѓорческа по голема битка беше поразена од актуелната јуниорска шампионка на Ролан Гарос, Австријката Лили Тагер, со 2-1 во сетови (4:6, 6:3, 4:6) по 2 часа и 35 минути игра.
Со овој пораз прекината е серијата од девет последователни победи на Ѓорческа, која сепак може да се пофали со импресивен биланс од 17 победи на последните 20 меча.
Во првиот сет Лина имаше одличен старт со предност од 2:0 и 3:2 во гемови, но Тагер го презеде ритамот и успеа да го добие сетот со 6:4. Во вториот сет повторно се водеше израмнета битка до 3:3, по што Ѓорческа со три врзани гема обезбеди изедначување (6:3). Решавачкиот трет сет започна одлично за македонската тенисерка која поведе со 2:0 и ја продолжи серијата на пет освоени гема во низа. Но, во финишот Австријката ја презеде иницијативата и по 4:4 успеа да освои два последователни гема и да стигне до титулата.
Ова финале е петто за Ѓорческа во 2025 година и вкупно 40-то во нејзината кариера, во која досега има освоено 15 титули, од кои две оваа сезона.
За пласманот во финалето, Ѓорческа освои 49 ВТА поени, со што од понеделник се очекува да се најде на 207. место на светската ранг-листа со вкупно 343 поени. Следната недела, најдобрата македонска тенисерка ќе настапи на турнир во Куршумлијска Бања.
