Вчера во Првата македонска фудбалска лига се одиграа два натпревари со различна тежина и емоции – Силекс ја продолжи перфектната серија со петта победа по ред, а Брера стигна до својата прва радост во новата сезона.
Во Кратово, Силекс беше поуспешен од Работнички со 3:1 и уште еднаш ја потврди одличната форма на стартот од шампионатот. Кратовци поведоа во 43. минута кога Хрвановиќ со удар со глава ја затресе мрежата на Василев. Во второто полувреме, Алиќ зголеми на 2:0, а Работнички се врати во игра преку Асани кој реализираше пенал во 79. минута по ВАР-интервенција. Сепак, конечните 3:1 ги постави Давид Матески во завршницата, повторно со потврда од ВАР собата. За „црвено-белите“ ова е петта победа од исто толку натпревари – максимален ефект кој ги држи на врвот на табелата.
Во Струмица, пак, АП Брера го совлада Шкупи со 1:0 и дојде до првиот триумф во Прва лига. Борбената средба беше решена во 85. минута кога Кире Стојанов успеа да се ослободи од чуварот и да погоди во спротивниот агол. Првично голот беше поништен поради офсајд, но по долга проверка во ВАР собата, погодокот беше признат, па домаќините конечно се израдуваа на првата победа оваа сезона.
Со овие резултати, Силекс останува лидер со максимален учинок, додека Брера со победата добива дополнителен елан за продолжението од првенството.
