Навивачката група „Ајдуци“ најави силна мобилизација и масовно присуство на утрешниот дерби-натпревар на Беласица против Детонит Плачковица од Радовиш. Верните поддржувачи на струмичкиот клуб преку транспаренти и повици по социјалните мрежи ги повикуваат сите љубители на „плаво-белите“ да бидат дел од големата вечер под рефлекторите.
Собирот на навивачите е закажан за во 17:30 часот во малиот парк во Струмица.
Фудбалската еуфорија во Струмица расте за дуелот од 4. коло во Втората лига, а управата на Беласица поради огромниот интерес донесе одлука да ја отвори и северната трибина на стадионот „Благој Истатов“.
Натпреварот ќе започне во недела од 19:00 часот и покрај големото дерби, ќе има и свечен момент посветен на клупската легенда Петар Андреев, кој со 555 настапи и 22 сезони во дресот на Беласица остави неизбришлива трага во историјата на клубот.
Од клубот апелираат сите присутни да придонесат за фер и спортска атмосфера. Се очекува „Благој Истатов“ да биде исполнет до последно место, што гарантира спектакуларна вечер за сите љубители на фудбалот.
