Летниот трансфер период на Одбојкарската федерација на Македонија за играчите од домашното првенство официјално е затворен. Женските клубови од Првата и Втората лига беа најактивни, доставувајќи вкупно 66 пријави за промена на средината, додека кај мажите до федерацијата пристигнаа 27 барања за трансфери.
Интересен момент е враќањето на две репрезентативки и интернационалки на домашната сцена. Теа Терзиевска ќе го засили новиот прволигаш Газели Волеј, додека Тамара Стојанова повторно ќе го облече дресот на Работнички Скопје.
Шампионот Јанта Волеј КВ, пак, останува без две свои репрезентативки – Ива Стојкоска се пресели во Наковски Волеј, а Симона Стојановска се врати во матичниот Пелистер Волеј, кој оваа сезона ќе настапува како прволигаш.
Кај мажите најзвучното засилување е трансферот на репрезентативецот Стојан Илиев во редовите на Штип УГД, клуб кој ќе има европско деби оваа сезона. Средниот блокер Филип Лепидовски, пак, по долги години во шампионот Струмица 47&72, кариерата ќе ја продолжи во ГОК Борец.
Со тоа трансфер периодот е затворен за играчите кои настапуваат во клубови од македонското првенство, но клубовите сè уште имаат можност за засилувања. Според правилата, тие можат да ангажираат странски играчи или домашни одбојкари со статус на интернационалци до октомври. Европскиот трансфер рок останува отворен до 6 октомври за жените и до 20 октомври за мажите.
