Младите ракометари на Еурофарм Пелистер 2 со победа ја отворија новата сезона во Суперлигата, совладувајќи го тимот на Прилеп со 32-29 (16-15) во возбудливо и драматично дерби одиграно во салата „Ристе Ристевски – Ричко“.
Дуелот, кој беше реприза на финалето на турнирот „Миле Нешкоски“ од пред две седмици, повторно им припадна на битолчани. Првото полувреме мина во израмнета игра, но со минимална предност на избраниците на тренерот Александар Зарков, кои заминаа на одмор со 15-16.
Во вториот дел домаќините се вратија и поведоа со 23-22, но токму тогаш на сцена стапи Христијан Митревски, кој беше незапирлив и со своите 10 погодоци го водеше тимот кон нова победа. Клучен момент беше и одличната партија на голманот Мартин Јовановски, кој запиша 17 одбрани, меѓу кои и неколку во самиот финиш на натпреварот.
Во завршницата гостите покажаа повеќе концентрација, ја вратија предноста и без поголема драма го обезбедија триумфот со 32-29.
Најефикасен кај Еурофарм Пелистер 2 беше Христијан Митревски со 10 гола, а по пет постигнаа Маркоски и Белистојановски. Кај Прилеп најрасположен беше Димитар Димитриоски, исто така со 10 погодоци.
Со оваа победа, Еурофарм Пелистер 2 ја продолжи својата импресивна серија и стигна до 25. триумф по ред, вклучувајќи ја и перфектната мината сезона во Првата лига.
